San Martin de Tor (1127 m s.l.m.)
L'inom "San Martin" é gnü surantut dala dlijia y se referî cina al scomenciamënt dl 19ejimo secul ma a chësta o alplü al pice aciasamënt che dependô da d'ëra, mai al paisc intier. Aministrativamënter n'el laôta nia ater co vijnanzes che dependô dala Iurisdiziun de Tor. La pröma documentaziun dl inom dl paisc de San Martin va indô al ann 1260 "vor der chirche zu sand Martin".
Incö é le paisc de San Martin capolüch dl Comun y ospitëia deplü strotöres importantes sciöche l' Istitut Cultural Ladin "Micurà de Rü", le Museum Ladin "Ciastel de Tor", le Distret sozio-sanitar a Picolin, l'Assoziaziun Turistica, sciöche ince deplü ofizi d'interes publich (banca, ofize dla posta, apoteca, ambulatore, mede dai tiers, socurs alpin, ciasa de palsa). Les ciases d'abitaziun é en gran pert gnüdes fates tl zënter, deperpo che i lüsc da paur é sternüs fora söles tëmples a per sorëdl. Le raiun artejanal crësc dlungia la Gran Ega fora y cumpëda incö n bel numer de aziëndes produtives. Mo ince sot al profil turistich é San Martin salpü da se concuisté na süa posiziun.
